Batisse : Bin, mi que j’voulos monter d’zeur ch’tôt pour nettier ché nochères et cheul mousse, me v’la dins d’bieaux draps. Pourquô qu’a fallu que j’passe par cheul lucarne ? Cha glisse, y a nin moyen d’avincher, nin moyen d’arculer non pu. J’in sue d’cau, me v’là prop’ ! Bertine ! Bertiiiine !

Bertine : Du ché qu’t’as cor grimpé, ti zote ? Te m’as l’air infardélé ! Mais qué balou ! Avec ti, ché toudis l’même canchon. Mais te n’es nin carpintier, sais-te ? Te t’acravinte, te t’esquinte inutil’mint. Si te continue comme cha, te n’fras nin d’vieux oches. Y a fauque ti pour faire cha. Et pi ravisse dzeur eut tiête, y vo queure eune drache.

Batisse : Chu su’l’glace d’eune nuit, Bertine. Y a rin pour eu’m ténir, cha dérape. Ché pas possib’, j’ai peur eud querre !

Bertine : Acoute, ché nin l’momint d’braire, nicdoul ! N’so nin in foufelle pour cha ! Am’mote qu’y a foc un moyen, et pas deux : J’min vas quère habile ch’l’équielle qu’est dins l’kotch. Et j’vas poser sin crochet à l’nochère d’où qu’y a ch’ballot.

Batisse : T’es djà là que te raccours, Bertine, t’es eune bonne, saitt ? Ché deul belle ouvrache. Fais gramin attintion si y’aurot pas un tro ou eun’séquoi dzous ch’l’équielle.

Bertine : N’t’in fais nin. Raviss’, cha n’berloque nin. Tiens-te à ch’ballot et à cheule farniète. Déchins tout duchemin. Met tin pied sul’boujon in haut de ch’l’équielle. Cha y est, te vlà trinquile à c’t’heure. Et l’prochaine fôs, au lieu d’cha, te f’ras tin gardin !

Batisse : Ouf ! J’vas m’assir un tiot peu ichi in haut. Bin te diras chin q’te voudras, mais mi, uche que chu ainsin, chu fin bénache !